يوم 15 مارس
وعادت ذكريات أول
بعد مالماضي أتحول
حبيب الأمس جانى اليوم
بعد مابالهجر طول
طبعآ مش ده اللي أقصده
بس أقصد أن يوم 15 مارس
اللي هو عيد ميلادى واللي أكيد ناس كتيرة جدآ كرهت دخول المدونة بسبب الدوشة والهيصة اللي عاملاها من أمبارح ..بس حقي ياجماعة ..الله.. هو مش عيد ميلادى ولا أيه!!
ثم أنا قررت أنى أحتفل بيه في مدونتى حبيبتى عشان يفضل ذكرة حلوة
المهم لفترة قصيرة اللي هى أول أمبارح أنا بجد ماكنتش بكره في الدنيا قد يوم 15 مارس!!
ليه بقي..لآنه عيد ميلادى ولآنى أنا بطبعى نكدية
عقبال عندكم فمن الطبيعى أحس أن اليوم ده مش حلو..النهاردة وعلي غير العادة أكتشفت أنه أحلي يوم في الدنيا
أو بمعنى أصح أحلي يوم في السنة كلها.
النهاردة جوزى رجع من الشغل...وطبعآ أنا أتبعت نظرية اليوم ده مش بيفكرك بحاجه ياحبيبي...وطبعآ هو بدأ يفكر بقي ويعصر دماغه
أمممممممم بيفكرنى بأيه بيفكرنى بأيه ...أيوة صحيح حد ينسي يم 15 مارس برضو ياقلبي ده يوم أستقلال مصر يابيبي سنة 1922؟؟
لالالا ....أستقلال مصر ايه بس أنا قصدى حاجه تانية أهم
أمم حاجه تاني أهم.... طبعآ ياحبيبتى وبما أنك مهتمة بقضية المرأة يبقي أكيد قصدك أن يوم 15 مارس هو يوم منح المرأة حق التصويت في فنلندا.
فنلندا أيه بس...طيب بص أنا هسهلهالك..هو يوم بالنسبالي حلو أوى أنا تقريبآ مش بحبه يبقي أييييييييييييه
أخخخخخخخ أنا أزاى نسيت ياحبيبتى والله طول عمرى بقول أن قلبك عامر بالإيمان!!
أذاى بقي قصدك أيه
قصدى انك اكيد بتفكرينى أن اليوم ده هو خروج النبي عليه الصلاة والسلام من مكه نحو المدينة بعد ما اتم مناسك حجة الوداع.
لأ طبعآ مش قصدى كده
اليوم العالمى لمناهضة تعسف الشرطة
لأ
اليوم الوطنى في المجر
برضو لأ
يوم الدستور في بيلا روسيا
لأ لأ لأ
أنت حفظت كل المناسبات التاريخية ونسيت أهم يووم بجد أخص عليك.
وقبل مادموعى تنزل لاقيته فطسان ضحك
تعالي بس تعالي..أما أنك حنبليه صحيح..حد برضو ينسي أهم يوم
أكيد طبعآ هتقولي يوم الأحتفال بمهرجان هونين في اليابان
هههههههههههههههههه
كل سنة وأنتى طيبة ياليلاء
وااااااااااااااااااااااااااااااو
بالذمة في احلي من كده
يعنى طلع فاكر عيد ميلادى ...وكمان عامل حسابه وجابلي أسورة عسولة
أما صحيح أن بعض الظن أثم
بجد ده احلي عيد ميلاد قضيته
وللعلم برضو يوم 15 مارس عيد ميلاد
المخرج شادى عبد السلام
الممثلة دانه جبر
لاعب الكرة الانجليزى كورتس ديفيز
الممثله لقاء الخميسي
الممثل أبراهيم الصلال
وغير ده كله هو يوم أستقلال مصر سنه 1922
كل سنة وأنا وأنتم طيبين
تعليقات
إرسال تعليق
قول رأيك خليك جرئ