أنجليشيون حتى النهاية
لاحظت حاجه غريبة بجد في الفترة الأخيرة
أن أغلب الناس علي الفيس بوك بتكتب أنجليشي معرب أو مايسمى بالفرانكو
ولأنى أساسآ عنيا نسختهم بتقري من اليمين للشمال بس
فبجد صعوبة أنى أقري الفرانكو ده
وقولت لازم أعرف السر
روحت أشتريت بالطو أصفر معفن من البالة وكوفية وكاسكتة ولبستهم وتقمصت شخصية المفتش كرومبووووووووووو
ودخلت الفيستوك
لالالالا أستنو
ولبست نضارة سودة كده أشطة
ودخلت الفيستوك
لاقيت أول كائن بيقولي
hi
فأنا طبعا قولته
hi
ولأنى مبعرفش أنجليشي زيه نسختها ولزقتها علطول وهو براحته بقي
قالي
how r u
طيب ودى هتكتبها أذاى ياحسيييييييين
قولت الشخص ده أصلآ مش هتعامل معاه تانى وروحت مأجنراه يعنى عملتله أجنور
شوية دخلتلي بنى آدمة لذيذة قالتلي اذيك يالوله وحشاننننننننى
أيوة كده هى دى الناس اللي ينفع أكلمها بالحضن ياقمر
بعد ماتكلمنا شوية قالتلي بتحبي تسمعى لمين يالولو
قولتلها أحب أسمه الست
قالتلي ايه
قولتلها الست
الست لما لما لما
قالتلي ياااااااااى يالولو بجد ذوقك cOOOOOOOL
ياحلاوة أنتى طلعتى منهم
ولما لاقيت روحى مش عارفة أفهم كلامها
ولاقيت كل الفيستوكيين مستنصدينى
قولت خلاص يابت ياليلي نفضي للكل وروحت مأجنرة نص الجيش اللي عندى في الفريند
وبعد صرااااااااع طويل مع نفسي
قولت أذاى أنا أبقي ذكية وجينياس ومشكلة الانجليشي دى توقف عائق بينى وبين الناس
وقعدت أفكر
وأفكر
وأحيان أنا أفكر وافكر وافكر ألي متى عزمى بالأشواق جاااامح
لحد ماااااا
وجدتها ......وجدتها
ترجمة جوجل كانت رايحة من بالي فين دى
وقولت محتاجة ضحية أجرب فيها الموضوع ده
روحت جربتها في واحد مصري عايش في هولندا
ونجحت
ومن يومها وأنا مافيش لغة بتوقف معايا
أى لغة ترجمة جوجل حاضرة
ورفعت شعار أنجليشيون حتى النهاية
تعليقات
إرسال تعليق
قول رأيك خليك جرئ