من سيربح البونبون..مسابقة ساخرة بقلم ليلي الشعينى.الجزء الثانى
الأسم:- واحد أهلاوى مجنون كورة.
1:- ماهو الوطن؟
الوطن يامعلم هو الأستاد ..نعيش وتموت وأنت بتدافع عنه وعن جماهيره .
2:- ماهى الوحدة الوطنية؟
أنك ياباشا تكون بتلاعب الزمالك ..قصدى الأهلي يعنى ...ولا أنت مش أهلاوى ياباشا والله شكلك زملكاوى...المهم تكون أنت أهلاوى وتلاقي الزمالك أتفرم 6/0 وبالرغم من فوزك تروح تطبطب عليه وتقوله تعيش وتاخد غيرها هى دى الوطنية ياباشا.
3:- مامعنى العنصرية؟
العنصرية دى ياباشا أنك تلاقي الكوتش بيقولك أنهم هيجيبو لاعب زملكاوى يلعب في الأهلي وأنت مترضاش لانهم أصلآ مش نافعين في حاجه هى دى بقي العنصرية ياباشا.
4:- مامعنى الديموقراطية؟
دى بقي ياباشا انا اعرفها..الديموقراطية يعنى أنك تبقي في الماتش كده وأبوتريكة يباصيلك الكورة تروح أنت رامح بيها كده ناحية الجون مع أنك أساسآ مش راس حربة ولا حتى جذع نخلة ليه بقي تجرى بيها بقي عشان معندكش ديموقراطية يامعلم.
المرحلة الثانية
1:- من هو الارهابي؟
د بقي ياباشا اللي يفضل قبل ماتش الأهلي والزمالك يقول الزمالك هيتغلب الزمالك هيتغلب ويقوم فريق الزمالك بقي من كتر الرهبة اللي حصلتله يتغلب بجد بقي ياباشا..هو صحيح هو بيطحن كل مرة بس المفروض منخوفهوش ياباشا ولا أنت رأيك أيه.
2:- ماهو التعصب الدينى؟
التعصب الدينى بقي أنه ييجى في ماتش النهائي في رمضان ويقولولك لازم نصوم والصوم لازم حتى لو في حرب ..الله ياخوانا الدين يسر أفطرو وبعدين أقضو ..ده أيه الغلب ده.
3:- من مفجر ثورة يناير؟
اللي فجرها واحد اهلاوى عترة ...أه ياباشا اللي بيعملو كل الانجازات هما الأهلاوية..طب اقولك ياباشا والله لو دورت عالريس ذات نفسه هتلاقيه أهلاوى.
4:- ماهو الدستور؟
الدستور هو القوانين اللي لازم يمشي عليها النادى كله وهو اللي بيضمن حق الاعب في الأحتكار برة عشان يرجعلنا فيرويد.
المرحلة الثالثة
1:- ماهى مطالب الشعب ؟
الشعب بيطالب بمباراة بين الاهلي وكل الفرق اللي مالهاش لازم عشان نعلموهم بقي أن الله حق وأن الاهلي عمهم وحارق دمهم.
2:- ماهى الحكومة المؤقتة؟
هى المكونة من رئيس الجهاز وكوتش الفريق ولعيبة الأحتياط.
3:- من هو رئيس مصر القادم؟
مافيش شك ياباشا هو لاعيب أهلاوى طبعآ وأبقي شوف.
4:- من أنت؟
أنا واحد أهلاوى بيكره الزمالك.
الأسم:- واحد محشش أسكندرانى.
1:- ماهو الوطن؟
الوطن هو إسكندرية الماريا يابرنسسسسسسسسسسسسسس.
2:- ماهى الوحدة الوطنية؟
ألوحدة الوطنية أنك تحشش مع الغلبان والغنى ولافرق بين أى حد أحنا بنحبو كل الناس .
3:- مامعنى العنصرية؟
العنصرية أنك تفضل الحشيش علي البانجو أو تفضل الشيشة علي الغرقانة ياعسسسسسسل.
4:- مامعنى الديموقراطية؟
الديموقراطية بقي أنك تسيب أى حد هو اللي يجهزلك الليلة يامعلم مش مهم صاحبك ولا صاحب صاحبك المهم يكون في مصلحة في الليلة دى.
المرحلة الثانية
1:- من هو الارهابي؟
أمن الدولة ياباشا.
2:- ماهو التعصب الدينى؟
هو اللي بيقولو المفتى ..هاهاهاهاهاهاهاهاهاها.
3:- من مفجر ثورة يناير؟
تجار الحشيش ياباشالآنه في واحد كبير قفشلهم تحميلة حشيش وهما ضربو دماغ وراحو ولعوله الميدان.
4:- ماهو الدستور؟
الدستور هو اللي بيقول حاجه والحكومة تمشي الشعب علي عكس ماهو قايل.
المرحلة الثالثة
1:- ماهى مطالب الشعب ؟
توفير الدمااااااااااغ عشان الشعب عايز يعيش ..وهو يعنى نزار ئبانى طول عمرو يقولك خبز وحشيش وقمر والناس فرحانه بيه والمصري لما يقولك عايز عيش وحشيش وأهو القمر في السما الحكومة تاخدو وتوديه ورا القمر يعنى .
2:- ماهى الحكومة المؤقتة؟
هى الحكومة اللي تيجى تكنس الفرشة بتاعت اللي قبلها عشان اللي جاية ترتاح فيها.
3:- من هو رئيس مصر القادم؟
واحد دمااااااااااااااااااااااااااااااغ.
4:- من أنت؟
أنا مش عارفنى ..أنا توهت منى ..أنا مووووووش أنا هاهاهاهاهاهاهاهاها.
الأسم:- صاحب مصنع نسيج.
1:- ماهو الوطن؟
الوطن هو البيت ..الشغل..البيت ياباشا هو كل مايأمن فيه الانسان.
2:- ماهى الوحدة الوطنية؟
أن فئات الشعب تبقي مع بعض مترابطة كترابط السداه مع اللحمه.
3:- مامعنى العنصرية؟
العصرية ياباشا دى بقي اللي بعيد عنك تبقي زى القماش الشايط مالهاش لازمة وسط ناس زى ماقلنا مترابطين كما السداه واللحمه.
4:- مامعنى الديموقراطية؟
الديموقراطية أنك تعمل القماش باللون اللي علي مزاجك وغيرك يشتري اللون اللي علي مزاجه هو.
المرحلة الثانية
1:- من هو الارهابي؟
الرسوم الجمركية العالية اللي بتتفرض علي المعدات اللازمة للمصانع اللي بيها بنطور البلد.
2:- ماهو التعصب الدينى؟
أنك تعيين ناس في المصنع من أبناء دينك بس ومتعينش حد من برا الدين بتاعك.
3:- من مفجر ثورة يناير؟
الشعب ياباشا لآن أساس الخامة بتاعت الشعب كويسة قصدى يعنى القماشة بتاعته بيضة من جوة ماتقبلش الظلم.
4:- ماهو الدستور؟
الدستور ده ياباشا زى الإبر اللي بتلضم القماش مع بعضه هو بقي اللي بيسهل التعامل بين الناس وبعضها لآنه منظم كل البلد قانونيآ .
المرحلة الثالثة
1:- ماهى مطالب الشعب ؟
الشعب ياباشا مطالبه مش صعبة قوى يعنى الشعب المطالب دى بالنسبة له زى المية بالنسبة للقطن..يعنى يدوب بس توفير رغيف العيش والأنبوبة وشكرآ كده الشعب قنوع .
2:- ماهى الحكومة المؤقتة؟
الحكومة المؤقتة دى بقي زى الباترون بالنسبة للقماش يعنى حاجه بتاعت وقتها وخلاص.
3:- من هو رئيس مصر القادم؟
رئيس مصر ياباشا هو واحد فاهم أمور البلد ولاضم مع الشعب وماسك خيوط البلد في أيده.
4:- من أنت؟
كوشتوبان المحلاوى ياباشا.
وإلي اللقاء في الجزء الثالث إنشاء الله
انتى دائما مدهشه كتاباتك تدل على فهم كامل لكل الاحوال المصريه بطبقاتها الشعبيه المختلفه والمعروفه بتقلبات ارائها ومعانيها المختلفه انتى تملكين طريقه جذب لعرض مفهومك عاليه جدا .
ردحذفالشاعر والفنان محمد عبدالغنى مصطفي
والله نورت مدونتى يامحمد
ردحذفويارب أكون عند حسن ظنك بيا وبكتاباتى كده دايمآ وميرسي علي القصيدة بجد رائعة
واتمنى أشوفك كده شاعر وفنان علي مستوى العالم بس ماتبقاش تنسانى