من غير عنوان

انا عمرى ماكنت مبسوطة
ولافرحانة
الحاله هى الحاله
مهما حاولت أغيرها
هى هى
حتى بأغانيها وفرحتها
ماتهمنيش في حاجه
فكرت أكتب عن نفسي
لاقيت الوجع متمكن منى
قولت أغنى
ولا غنايا فادنى بحاجة
قولت ابتسم للدنيا تانى
طلع الفرح كله
كلام بيتقال في أغانى
طب أعمل أيه
أشيل همى وأسكت يعنى
هو اللي فرحو حظهم أحسن منى
ولا أنا اللي وحدى بغنى
علي نغمة كانت عايشة جوة منى
قولت أنا هكتب وأضحك الناس شوية
لاقيت الهم والفرح مش هما القضية
القضية فيا أنا
في ذاتى
فضلت أصرح وأهاتى
ومحدش سامع حسي
نسيت حتى أنا نفسي
نسيت أنا رايح فين
محدش نصفنى في محنتى
ولا طبطب ومسح يوم دمعتى
ولا حد فكر يسمع مرة شكوتى
والحاله هى الحاله
هموم جاية ورحاله
وأنا لو عليا أكتب من ده قوالة

بس مين يسمع

طيب
ماهو لو عالقصة ماهى معروفة من زمان
تيجى للدنيا وأنت تحت مسمى أنسان
غلبان عدمان سعيد فرحان
مش هى دى القضية
ولا القضية تكون تحت مسمى مدنية
ولا شيوعيه أو علمانية
القضية أنك أنسان
بس آه لما تكون فعز العز متهان
وآه لو تنوح وسط البلابل غربان
تبقي القضية كبيرة شوية
محتاجه حزم ومسئولية
محتاجه أنى أفكر فيا
قصدى افكر في الايام اللي جاية
بس ماهى الايام هى هى
وحتى لو راحت المسئوليه
ولو حتى أنا مابقيتش هى
الدنيا بتلف بينا وهى مغمية
وأحنا فيها ماسكين أيديها وهى الدنيا زى ماهى
عارفة أن الجنان مابينا وبينه شعرة
وعارفة أن الكلام أخرة مواجع مرة
بس أنا أعمل أيه في اللي جرى واللي بيجرى
أعمل ايه في غلب مالوش حدود
أعمل ايه فدمع مش مستوعباه سدود
ولا كلام مباح ماتعملش عليه قيود
مأنا لو عارفة أللي بيا
كنت أرتاح من اللي فيا
بس القضية أنى مش عارفة أيه هى القضية