حكومة الفن

هذا ومن منطلق أن البلد دى بلد أبويا وجد جدى بلد أبويا واخواتى بعدى لأنى مبخلفش تهئ تهئ تهئ

فكرت في فكرة حلوة...نعمل أيه بقي لو صحينا الصبح ولاقينا الحكومة كلها اتخنقت من الشعب اللي مش عاتق جمعة من جمع الاسبوع الا ومستغلها إيشي جمعة كرامة إيشي جمعة غضب إيشي جمعة الشوان..المهم لاقينة الحكومة اصدرت بيان وبالإجماع قالو علينا الطلاق بالخمسة وتمانين مليون أحساس ماحنا شغالين فيها وأولعو بقي مش بتقولو بلدكو أولعو بقي...يامصيبتى يختى البلد فضيت مابقاش لينا كبير ...مالناش كاسر طب أيه الحل بقي.

هنخبط في بعض شوية ..وبعدين نروح ميدان التحرير آه ماهو ربنا مايقطع لنا عادة..بس المرة دى من غير مانتقيد بيوم جمعة لآنه سيكون الأسبوع كله جمعة وأخواته مع الأعتذار لجمعة لو زعل ..وكل الشعب في الميدان ...نعمل أيه بقي ..يطلع علينا خالد يوسف ويصرخ أنقذو البلد أنقذو البلد البلد بيتبوظ .

ونلاقي كام مليون أحساس راحو يحمو منطقة مصر الشرقية والغربية والدرب الأحمر والشرابية...وبعدين نعمل ايه ...أمممم أقولكم في الحالة دى هتكتر الأغتصابات بقي والسرقة والدوشة ولازم نحاول نلم البلد بسرعة.

حد يقولي القوات المسلحة أقوله انا قولت النظام كله زهق مننا بما فيهم القوات المسلحة ..أول حاجه بقي نعملها نجيب كل اعضاء حركة كفاية ونوزعهم علي مناطق الجهورية كلها دول بقي كلمتهم اللي هيستعملوها دايمآ هى اسم الحركة.

مثال يلاقو عيل بيضرب أخوه يروح واحد من الحركة يضربو لحد مالواد يقول كفاية كده بقى ضمنا ان النشئ الجديد من أنصار حركة كفاية حد يقولي ماهو مش كل البلد هتضرب بعضها عشان يرددو الشعار منا هقولك يافصيح ان وهو كده كل الناس هتتلم من التحرش ولا السرقة ليه بقي أضرب المربوط يخاف السايب.

نيجى بقي لتشكيل حكومة مؤقتة ولازم هتبقي من الشعب ...طيب مين الاصلح بقي أقولكم أول حاجه نجيب ساويرس يمسك الأعلام لآنه لازم نعملنا واجهة من خلال الأعلام عشان الدول الشكيكة ماتطمعش في البلد في الفترة دى ونخلي كل ماحد يتصل علي قناة يسال عن أن مصر حصل فيها كذا ولا كذا الرد ياجماعة هيبقي رد واحد هو ..O ماشي يابا .

نيجى بقي للكيان الرئيسي اللي لازم ننتبه له آلا وهو أن البلد من غير شرطة ولا قوات مسلحة ولا أى حاجه من الحبشتكنات دى كلها نروح نجيب محمد شومان ونخليه علي تبة أو مكان عالي وسط الميدان ونشوف هنمسك مين بقي القوات المسلحة ...أنا من رأيي نمسك القوات المسلحة لمحمود ياسين ليه بقي طبيعى يمسكها محمود ياسين لآن هو الوحيد اللي الرصاصة لاتزال في جيبه .

هتقولولي الناس هتعترض ..فاكرين محمد شومان اللي وقفناه من شوية مانا مش موقفاه عياقة يعنى ده بقي عشان يمتص غضب الجماهير أحنا نقول محمود ياسين الناس تقول لآ شومان يقول مصلحتك اولآ وخلصت .

حمادة هلال بقي بما انه الوطنى الجميل السكر نخلية يمسك وزارة الري ده آخره لآنه هتبقي الخساير معاه مش مهمة أولآ لو حصلت مصيبة وجابوه وواجهوه طبعآ ياحماد عارف دفاعك هتقول أيه .. مش أى حد يقولك عنى كلام تصدق ده انا زى موج البحر واللي يبيعنى يغرق وأهو عشان المية اللي في اغانيك دى هنمسكك وزارة الري.

أنا ياجماعة بختار الوزير والوزير بقي يختار اللي هيشتغلو في وزارتة لآننا لازم نلم البلد بسرعة زى ماقولنا .

طيب نعمل وزار فرفشة بقي ونخلي مقرها وسط البلد لازم بقي الوزارة دى نعملها عشان أحنا اكيد هيتحرق دمنا في الفترة دى نخلي  الوزير بقي دينا الرقاصة ليه بقي لآنها أولآ حتهز وسط البلد وزى ماشعب هتلر كان بيمد أيده ويقول هاى هتلر نخلي لزامآ علي اى مواطن يعدى من وسط البلد اللي هى مقر الوزارة لازم يحط صوباعة فوق مناخيرو ويقول منك لله ياحسام .

وزارة السياحة بقي بسرعة مين يمسكها....أممممممم مافيش غيرو ياجماعة حكيم الجماهير هتعترض ..أتكلم ياشومان قولهم مصلحتك أولآ.

المهم حكيم نخلية وزير السياحة لآنه كل ماوفد ييجى لمصر يقوله السلام عليكو وبكده ضمنا السياحة تنشط في مصر خلاص كده السياحة .

خش بقي علي  وزارة التربية والتعليم ودى طبعآ من زمان مختارة وزيرها كلو هيفتح بقو ويقولى ياترى مين ..أقولكم أولآ لو رجعنا لمسيرته الفنية هنلاقيه من زمان فنه موجه للطفولة وللتعليم لذلك هنخلي محمد منتير وزير التربية والتعليم ونخلي شعار الوزارة المريلة الكحلي ونشيد الصباح الموحد هو بكار بكار بكاااااااار .

مين بقي وزير البيئة أمممممممم...تفتكرو نختار مين يارتيى مين ياترى مين أظن محدش اصلح منه هو مافيش غيرو محمد ثروت ليه بقي طول عمرو بيصرخ ويقول عايزينها تبقي خضرة الارض اللي في الصحرا ونخلي اللي يمسك مهام الوزارة معاه الأستاذة حبية بابا رشا بالاضافة الي جدو علي وطيور النورس أظن دى احلي وزارة وأسهل وزارة .